尋日開鑼嘅國際茶展及美食博覽旺丁又旺財，就連食品推介會都一樣咁受歡迎，好似寧波優質農產品推介會就吸引好多名人出席，好似中華總商會副會長兼上海總會副理事長李德麟同美心集團董事伍威都係座上客。
究竟上海菜同寧波菜有乜分別呢？身為寧波人嘅李德麟話廣東菜包含客家菜，如此類推，上海菜就包含咗寧波菜嘞！
跟住佢大談食經，話寧波菜屬於滬語系菜式，多數食材為海鮮，味道偏鹹，好多都係醃咗以方便儲存，著名地道寧波菜式有鹹菜黃魚湯、海蜇頭、炒蝦仁同烤菜等，當中最矜貴就係野生黃魚，好大條，香港要賣幾千元一條，而內地野生黃魚一條亦要幾千元。佢仲話上海總會嘅生意唔錯，依家諗緊研究將上海菜同廣東菜融合，變成Fusion菜喎！