話說城大學生會尋日搞迎新誓師大會，郭校長本來只係同三百五十幾位新同學見面，但喺最後見到四百個新舊學生一齊「大合跳」時，佢邊睇邊拍手，仲愈睇愈高興；等班學生跳完一次，佢終於忍唔住要落場跳埋一份，之不過班學生練咗好耐先跳畀校長睇，郭位點可以睇一次就學得識吖，惟有一個個舞步咁跟住班學生跳。雖然最後只係跳咗短短五分鐘，但可以咁近距離同校長打成一片，班學生不知幾興奮！

事後郭校長大讚班學生跳得好lovely，雖然佢唔可以陪啲新同學一齊入迎新營繼續玩，但就決定咗今日入度假營探吓班，到時仲會同大家一齊扯大纜添！