仲有兩個零月先到萬聖節，但海洋公園尋日已率先介紹今年「哈囉喂」節目。主席「扮嘢文」盛智文當然唔會放過扮嘢機會，今年造型叫「魔界王」，出場時喺墳墓「爆」出嚟，好有氣勢㗎！但睇真啲，佢除咗將塊面化到面目猙獰外，仲頭戴鳳冠、身穿龍袍，點睇都唔似「魔界王」喎！
扮嘢文為自己辯護，話二十多年嚟喺蘭桂坊搞萬聖節活動，做咗海洋公園主席又大搞「哈囉喂」，早就將萬聖節變成本土節日，所以今年以中式造型示人都幾貼切喎。用咗幾耐時間預備呢個造型？佢懶神秘咁唔肯透露，仲同女記者打趣話咪好似你哋見男朋友前化妝咁耐囉。
為宣傳鬼屋遊戲，佢竟然親身瞓棺材，認真大吉利是。有攝影大佬影唔到相要求佢瞓多次，佢冇托手㬹之餘，仲交足戲話自己係「魔界王」，冇有怕添！