哪吒喺短短幾個月成為黨內嘅風頭躉，其實黨內已捲起暗湧。聽聞有黨員不滿哪吒自視高，最終係咪可以排頭位出選係未知之數，叫大家唔好咁快押注。

田二少或轉戰新界東

消息分析，哪吒代表富貴黨出戰新界東仲有好多障礙。第一，佢現時係西貢區區議會委任議員，大多處理將軍澳區嘅民生問題，但由於唔係直選出身，按黨內不成文規定，欠缺喺直選排頭位嘅入場券資格。

第二，田北辰有意喺二○一二年再攻直選，除九龍西外，港島同新界西都係目標選區。其實田二少最終轉戰新界東，勝算將會更大，事關田少喺新界東經營多年，雖然舊年敗陣，正所謂爛船都有三斤釘，依家大哥唔選，細佬接班名正言順。所以，哪吒疊埋心水部署出戰新界東，以為已經水到渠成，可能只係美麗嘅誤會咁話。

哪吒係咪富貴黨新界東直選嘅最佳人選，我哋唔知，但係黨內對佢有微言就事實擺在眼前。尋日越洋打電話問個究竟，佢話未聽過黨內有條規定直選區議員先至有資格排頭位出戰立法會直選嘅規矩，強調自己多年嚟都勤於地區事務，但佢冇正面回應係咪早就知道出戰有暗湧，只稱同黨友關係和洽，好似後日咁就會同劉健儀出席地區活動，支持北區區議會副主席侯志強當上上水鄉事委員會主席。

富貴黨經歷「家變」重創，傷處啱啱埋口，竟然又發生黨內矛盾，而哪吒、主席劉健儀同田少一班高層今日返港，可能第一件要處理嘅事就係同黨內嚟一次開誠布公嘅交流大會，疏導下啲怨氣。