政府打算喺大埔區率先推行校園驗毒試行計劃，教育局前日開簡介會解畫，話會堅持「自願、保密、專業、幫助學生為本」四大原則。不過，淨係「自願」一項，已經令計劃形同虛設，成個散晒。

按照政府講法，就算學校自願參與，家長簽埋同意書，學生仍有權拒絕驗毒，話唔玩就唔玩，當局老鼠拉龜無從入手，至多派社工繼續「跟進」吓。有與會人士質疑，畀學生自行決定驗唔驗毒，「推行呢個計劃有咩作用？」官員O晒嘴答唔出。

咁嘅結局都預咗啦。計劃一曝光已經惹嚟各方質疑，話計劃漏洞多多，配套措施同指引又唔足夠，擔心倉卒推行會弄巧反拙。天主教團體對計劃態度消極，教育界驚主動參與驗毒，一旦校內有學生證實吸毒，會形成負面標籤。

叮！近年吸毒問題年輕化，毒品入侵校園，青少年濫藥出事嘅個案愈爆愈多，校園抗毒刻不容緩，市民亦支持當局採取積極有效嘅措施。但係呢個平時唔做嘢、做嘢打爛嘢嘅政府，為咗補鑊夾硬嚟，未經詳細規劃，未考慮過可能引起嘅負面後果，就急就章推出計劃。

政府話反吸毒係持久戰，但備戰工夫一塌糊塗，有姿勢冇實際，等於攞起支冇上子彈嘅槍去打仗，想唔輸都難啦！大埔區校園驗毒試行計劃呢個「抗毒第一仗」，開頭大鑼大鼓係威係勢，到頭嚟驗唔驗毒學生話晒事。試問，如果真係有學生吸毒，佢哋點會自投羅網吖，咁嘅計劃擺明係自欺欺人。

吸毒年輕化愈來愈嚴重，皆因當局長期忽視問題嘅嚴重性，執法不力，未能有效打擊販毒集團同拆家。政府唔去解決毒品源頭問題，反而搵教師同學生嚟搞，完全係本末倒置。

嗱，依家好多毒品都係青少年由內地帶返香港，對付佢哋最有效嘅方法，係出動任勞任怨嘅緝毒犬，正如啲細路話齋，唔怕警察、唔怕海關，最怕緝毒犬。既然係咁，照計應該派多啲緝毒犬喺各關口吖，點知唔係嗰回事。

當局做啲唔做啲，緝毒犬居然唔係全程無間斷執勤，留低「無狗真空期」畀帶毒青少年吼準機會，掂行掂過。其實，增加多啲緝毒犬所費無幾，而且仲證明有效，政府咁都唔去做，偏偏要勞民傷財搞校園驗毒，捉埋學校、家長、學生、社工一齊幫佢做齣大龍鳳，簡直豈有此理！

煲呔曾實牙實齒話，對吸毒青少年要「見一個救一個」，可惜，校園驗毒計劃呢場騷，未正式上演已經淪為一場鬧劇，如果繼續做落去，都唔知點收科。叮！