工程界立法會議員何鍾泰參與過好多建築物嘅籌建工作，尋日佢去咗台北縣喺香港舉行嘅招商會，原來佢七十年代已經幫手做台灣榮民總醫院嘅建設工作，協助做首期抗震設計。佢話，低矮嘅建築物好多時被忽略防震需要，但呢啲建築物往往好重要，所以佢有份設計嘅九龍塘火車站同葵青劇院都加入咗防震設計。
何鍾泰話，香港好多層數較少嘅建築物都有危險，好似學校、醫院、警局、消防局就最高危，事關呢啲建築物喺設計上冇考慮到防震，又唔同啲十幾層樓高嘅樓宇咁做到防風防震。
由於醫院、消防局等都屬於災難緊急救援設施，有起事上嚟真係唔知點算，佢已經同政府反映咗好耐，唔明點解相關部門到依家都冇反應又冇改進。