行政會議召集人梁振英（CY）近排變成城中焦點，幾乎乜嘢事件佢都有份，台北縣政府經濟發展局長李斌日前率領經貿團來港，尋日舉辦招商推介會，CY又喺場中出現。佢早排先帶過香港專業人士訪問團去台灣，今次梗係唔少得啦，佢仲喺致辭時大力推介香港，話香港功能多多，直頭好似「萬能插蘇」咁。
呢個活動目的係推動港台貿易，CY致辭時話台灣同國際經貿接軌，需要萬能插蘇，而香港嘅中介角色就好似佢公幹帶喺身邊嘅萬能插蘇一樣，無論圓形、方形、三腳或兩腳插蘇都用得上，台灣可透過香港同國際接軌。
CY呢個比喻都可算搞鬼，只係香港似萬能插蘇呢個比喻實在可圈可點，引起反效果就唔好啦。
