香港考試及評核局近年表現差劣，唔係畀申訴專員公署鬧餐死，就係累到班考生雞毛鴨血。尋日政府宣布考評局換莊，搵咗人力資源顧問吳克儉做主席，代替月底卸任嘅顧爾言，任期三年。不過，呢個委任卻引嚟舊電池嘅質疑，擔心無法改革考評局，更令人擔憂嘅係，吳克儉任公職嘅出席率似乎麻麻，會唔會搞到考評局出現潛水風㗎？
吳克儉去年已經係考評局委員，今次由委員變主席，可以話新意欠奉。只係考評局早前被申訴專員批評人事管理好差，唔通想借吳克儉嘅專長整治吓？吳克儉都係公職王一名，除係香港教育學院校董會副主席，又兼任房屋委員會同方便營商諮詢委員會成員。頭頂嘅帽多多，表現又點呢？
佢做房委會委員時，已經畀人批評佢成日潛水，好似喺○七/○八年度嘅五次房委會大會中，吳克儉只出席咗一次，但最後政府仍然將佢嘅任期續任到二○一○年三月三十一日，當時已惹嚟非議，家吓佢入主考評局，每年要着手推動同十幾萬考生福祉攸關嘅公開考試，真係少啲心都唔得㗎！