泰國蘇梅島係香港人好鍾意去嘅度假勝地，早兩日傳出單客機降落時衝出跑道嘅事件，好多人都有啲戒心，經常去蘇梅島度假嘅觀塘區議會主席Bunny陳振彬就冇有怕，尋日下晝仲如期同家人出發去蘇梅島。
Bunny話並唔擔心航空安全問題，事關嗰架客機出事主要因為天氣惡劣，而且生死有命，如果驚，就做多啲善事囉。問起點解咁鍾意蘇梅島，佢話蘇梅島好多嘢玩，可以享受陽光與海灘外，仲可以食盡泰國以外嘅世界各國美食。
尋日出發之前，佢先為觀塘區全城抗毒系列活動揭開序幕，佢話時下年輕人吸毒情況好嚴重，全城抗毒已刻不容緩。講到教育局局長孫明揚話校本驗毒計劃學生有權拒絕驗毒，Bunny認為，學生私隱權問題只係行政措施，相信有辦法解決，希望大家唔好再花費時間辯論私隱，而應該盡快落實驗毒計劃。