本港有多間大學喺世界大學排名榜上位列一百之內，教育局副局長陳維安係美國兩所長春藤大學嘅畢業生，先喺普林斯頓大學取得機電工程理學士，再喺哈佛大學取得應用數學碩士，學歷絕唔簡單。尋日佢參加中大微軟亞洲研究院共同成立嘅「利群」重點實驗室嘅揭幕典禮，就對中大嘅一項研究好有興趣，仲覺得幫到教學。
佢睇完中大博士生嘅作品後，忍唔住講：「我喺大學嘅研究同作品已經唔能夠同今日比較。人老咗，跟唔上科技潮流喇。」乜嘢令呢個長春藤大學嘅畢業生咁感嘆呢？原來尋日嘅展覽中，有一套語音合成及語言識別技術系統，呢個系統能夠糾正用家嘅英語發音。
套軟件係由中大工程學院副院長蒙美玲領導研發，用家跟隨「老師」朗讀後，發音錯誤嘅生字會以紅色標出嚟，對糾正港式英文好有效。蒙教授計劃將套軟件免費放上網，令更多人受惠。