去年立法會選舉後，富貴黨幾乎分崩離析，原黨魁田北俊辭職後只保持普通黨員身份，不過上個月起，田少卻低調重返富貴黨核心，當選新一屆中委。據講，田少今次係應黨內高層邀請回歸坐鎮，極有可能做埋常委，似乎該黨要借助田少嘅江湖地位維繫工商界黨員。
富貴黨上月底選中委，當選六十人名單之中，赫然出現田北俊個名。據黨內消息話，田少無意重返立法會，喺二○一二年只會扮演轎夫角色，喺新界東富貴黨名單排第二，希望力保愛將方國珊入局。田少今次捱義氣撐富貴黨，係要箍實班工商界黨員，事關佢喺總商會、工總同紡織界最大票倉紡織業聯會有深厚人脈，而且富貴黨中委每年開會一次，功能只係召開會員大會，田少嘅角色好似富貴黨嘅協調部部長咁啫。
不過，有政界人士分析，富貴黨搵田少再出山，唔止係怕流失黨員，仲牽涉二○一二年立法會選舉。