本文重點
社會福利署署長「阿魚」余志穩榮休，歡送宴搞個不停，佢尋日更連趕兩場，下晝見完記者，夜晚就出席社福界搞嘅二十席榮休晚宴，可算風光退休。不過，心水清嘅人都會發現，佢退休嘅大龍鳳都係由社福界搞嘅，即使立法會議員、社福界對佢署任冇得升正好多批評，政府高層至今都冇任何溫言細語嘅表態，或者正面表彰，阿魚尋日講起件事都難免單單打打，睇嚟，佢行出政府大門時，心入面真係唔知係悲定喜！
阿魚尋日同一班傳媒會面講心底話，回憶過去歲月雖然好輕鬆，但講到冇得升正一事，佢嘅說話都有啲骨，佢先坦承曾經因為冇得升正而失望，但已經接受咗，不過，講到最希望畀市民乜嘢印象，佢咁樣講：「哦，原來呢個係余志穩，官雖然唔係做得好高，但都盡責……」
大紫荊之父坐唔到大班椅
被問到佢係咪同前頂頭上司林鄭月娥不和時，阿魚話兩個人並非唔friend，仲好老友，只係佢個人好直，雖然佢都想諗要圓滑啲，但都做唔到。為官二十幾年，阿魚雖然飲恨於升遷，但就賺到社福界嘅友情，好似界別嘅立法會議員張國柱就幫佢狠批政府，話政府示範咗一個親民冇前途、擦鞋有上位嘅官場範例，啲官員第日只會爭相擺官威、做擦鞋官，一定影響政府管治。
阿魚尋日又話，大紫荊勳章個名係佢諗嘅，當時靈感嚟自硬幣嘅紫荊花，希望他日子孫有機會攞到啦。呢個大紫荊勳章之父又話，退休生活，對佢嚟講好似印度人所講嘅人生第三階段，即修行期。咁最唔捨得乜嘢呢？佢指一指辦公室入面四張直背椅，原來佢任職工務局時已有腰痛，升官後坐唔到大班櫈，惟有走去政府地牢左摷右摷，終於搵到幾張陳年直背椅，每次調任，都會帶埋四張櫈走，今次退休，無可奈何要同幾張至愛講拜拜嘞。