西貢北有條土瓜坪村，附近係紅樹林濕地，周圍綠水青山。不過，近排村後面有成兩個籃球場咁大面積嘅樹林畀人砍伐，估計有過百棵大樹被連根拔起，搞到好似瘌痢頭咁肉酸，乜嘢大自然氣息都冇晒啦。

據了解，原來有人申請喺嗰度興建十幾二十間丁屋，依家平整緊土地，政府亦諮詢緊有冇人反對。不過，諮詢同保護樹木完全無關。地政總署回應話，有關地段屬集體契約舊農地，喺嗰度移除或修剪樹木或翻土挖泥，毋須向大埔地政處申請批准喎。

咦，政府咪成日話保護樹木，「人樹共融」嘅？管樹大隊長唐唐仲建議發展局轄下增設兩個負責樹木管理、綠化及園景新部門添，睇住有人喺風水林左斬右劈都唔理，乜原來又係齋噏(口架)咋？

叮！咪睇政府扮晒叉燒，嗌行晒保護樹木，原來係隻無牙老虎，就算見到有人亂斬亂伐，根本咬佢哋唔入。因為本港現時根本冇保護樹木嘅相關法例，喺私人土地上砍伐或移除任何樹木，就算係珍貴嘅稀有品種，都唔使事先申請批准，話斬就斬，政府都冇符。

其實問題唔係今日至出現，唔少樹木專家同有心人士一直要求政府制訂獨立嘅《樹木法》規管斬樹，保護環境。但呢個縮骨政府一於拖得就拖，樹木就算逃過被斬厄運，一樣冇人理，唔生唔死條條Fing，直到舊年赤柱發生古樹砸死港大女生嘅慘劇，政府至忽然「綠化」，關心起樹木。

叮！正因為無法可依，有關部門同樣亂咁嚟，唔理好醜，係又斬，唔係又斬。康文署因為畀輿論狂炳對樹木監管不力，上兩個月發出新指引，區域樹隊主管毋須向該署嘅「保護樹木審核委員會」申請，就可以自行決定對「潛在倒塌危險」嘅樹木大開殺戒。

至搞笑嘅係，就算「有心」保育，都會搞出冇腦笑話。鯉魚門度假村有棵朴樹早喺○四年就畀人斬咗，但係棵樹嘅「遺照」居然仲喺康文署嘅古樹名木冊度。咁搞法，睇怕香港啲古樹死晒，政府都仲烏吓烏吓，繼續出呢本「虛擬名冊」。

唐唐領導嘅專責小組避重就輕，唔敢對症下藥，淨係識疊床架屋增設新部門。政府連相關法例都攞唔出，嘢又做到亂晒龍，仲講乜鬼保護樹木吖，到頭來咪又係敷衍市民做場大龍鳳，做完騷就關人個關。就算加多十個乜辦物辦，樹木咪照樣斬少見少，盞嘥氣啦！