社工舊橋呃細路

中學會考放榜，有社工組織擔心應屆會考生好大壓力，提前一個禮拜搞咗個減壓活動，幾十個人柴娃娃去船灣淡水湖主壩放紙鳶，寓意將壓力釋放咗上天空咁話。

放紙鳶減壓，令人諗起以前啲姑娘會對啲血氣方剛嘅初中學生講，一遇到有衝動嘅時候，唔緊要，即刻去打番場籃球發洩咗就得嘞。小弟經過長時間研究，可以寫包單個方法係搵笨，估唔到今時今日嘅社工，仲用埋呢啲陳年招數呃細路。

何況呢一代嘅小朋友對會考成績根本冇乜壓力，就算科科肥又點吖，有「剪翅」、有「蟻進」，只要阿媽阿爸未失業，大把學店肯收。好嘞，如果真係有壓力嘅話，不如學吓環保高官咁，一日上六個鐘鹹網，乜壓都減晒啦！

網友回應......

能者

唔好話啲學生，有唔少學校都掛住搞下學期轉制啲準備，連會考生都少咗理呀，大家都已經開始當會考無料到啦！難為當年我考得咁辛苦！

白必圖

睇嚟好似係家長急過學生喎，聽講話有一成學生唔知邊日放榜，可能仲喺屋企玩緊攬枕唔知醒。

冒名

睇新聞淨係見家長排長龍等學位，差啲以為啲學生年紀大咗。

沙魚

讀唔到書唔緊要，仲有大把出路，政府成日叫我哋北上發展，上去搵份一千蚊工當體驗生活囉。

小肥

畢業等於失業，為咗唔失業，求其搵嘢讀吓囉，例如副學士，假假哋都叫「學士」，呃唔到人，都可以呃吓阿媽。

PETER

唱K、打機、行街、買嘢、上網……日日都減緊壓(口架)啦啲學生，係啲組織自己想減壓咋？

熊仔

求學不是求分數係政府教(口架)嘛，咁小朋友緊張啲成績嚟做乜？

makiyobaby

啲o靚模一係中四唔讀書賣肉，讀完中五，放榜都唔去拎成績單，佢哋邊會有壓力吖。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：

www.sunsiupak.blogspot.com