06/08/2009

播放本新聞相關短片

政情:搞搞政:婦團家常菜歡送阿魚

本文重點
就嚟退休嘅社會福利署署長「阿魚」余志穩近期人氣爆燈,除咗不斷畀議員送高帽讚佢係絕種好官外,社福界龍頭香港社會服務聯會亦為佢搞歡送會,每人收費大概要三百蚊。群福婦女會主席廖銀鳳就話,幾百蚊食一餐雖然唔算貴,但佢哋嘅會員就唔係個個都畀得起,所以佢哋索性喺尋日搞個小型歡送會,答謝阿魚多年嚟嘅照顧。

打工仔勒緊褲頭

依家時勢唔好,打工仔個個勒緊褲頭,又難怪佢哋要慳皮啲嘅,但阿魚可以食到佢哋班姊妹親手下廚炮製嘅家鄉小菜,實暖到入心啦!其實,阿魚前日已事先多謝群福婦女會嘅厚愛,尋日佢更禮尚往來,捐咗一萬蚊畀該會做應急基金,又帶埋生果、朱古力做禮物,仲以雨後彩虹鼓勵一班受助婦女積極面對人生。

廖銀鳳大讚余志穩「有心、有耐性」,話上月阿魚親自了解家暴受害人嘅情況時,一聽就聽咗四個鐘,結果連午餐都唔記得食。該會嚟緊會約見新嘅社署署長聶德權,廖銀鳳最希望新署長可以學似阿魚咁,「做唔到都盡力做,凡事行多步」。