佢話新大樓設計係可以用五十年，故早喺政府就整個添馬艦工程諮詢公眾時，已講明會有四期擴建計劃，最多可以容納一百二十名議員同因而增加嘅議員助理及秘書處職員，但承建商○七年向城規會申請批准時，冇一併交代該四期擴建計劃，負責監督工程嘅行政署亦冇提醒承建商補番。

直至立法會行政管理委員會研究需否加快擴建計劃時先發現有關問題，其中做過城規會副主席嘅議員劉秀成就直斥政府做漏嘢，甚至有隱瞞城規會之嫌。

Pauline又透露，行政署喺規劃新政府總部嘅辦公室樓面面積時，一早預咗有一成後備空間，但立法會新大樓就完全冇預到，如果唔係行管會發現得早，等到施工後期先要求加碼，工程費肯定又會大增，嘥公帑又唔環保。佢一再強調，今次事件係因為政府兩度做漏嘢造成，立法會咁做只係幫政府補鑊，絕非偷雞臨時加碼霸地！