06/08/2009

播放本新聞相關短片

政情:肥胡煲冬瓜夠普通

尋日喺一個「台港論壇」上,醫管局主席「肥胡」胡定旭大談加強兩地喺醫療同防疫方面嘅合作。

由於論壇以普通話進行,所以肥胡都以普通話致詞;到咗問答環節,台下有人以廣東話發問,佢先改番用廣東話回答,但答完後,問答環節嘅主持人竟然問:「你在講廣東話還是普通話?」肥胡即時話自己講緊廣東話,結果畀主持揶揄:「胡主席講兩種語言都一樣流利,大家都分不出來了。」惹得哄堂大笑。

肥胡事後都自嘲煲冬瓜水平普通,話其實已經好過以前好多喇。佢憶述九十年代曾經有機會同中央嘅領導人面談,但對方講乜嘢,佢一句都聽唔明,最好笑嘅係,當時佢硬住頭皮用煲冬瓜同對方溝通,但人哋就叫佢講番廣東話,佢當下好詫異咁問:「你聽得明廣東話?」點知對方竟然話佢講普通話定係廣東話大家一樣聽唔明,所以唔想佢講得咁辛苦喎。