06/08/2009

播放本新聞相關短片

政情:高官患立會恐懼症

以前有啲議員投訴立法會議事廳啲梳化座椅「太阻碇」,兼且對脊骨唔好,所以行政管理委員會喺○七年就以每張三千三百蚊嘅造價,一次過換晒議事廳八十一張議員同官員座椅。應該冇投訴喇啩,點知秘書處又收到投訴,話議事廳啲座椅坐得耐會腰酸背痛,要求秘書處跟進吓。

有投訴梗係要認真處理啦,點知秘書處問咗好多位議員,個個都話唔單止冇問題,仲坐得好健康添!咁究竟邊個投訴呢?原來係政府高官。

點解高官會坐得咁辛苦?唔通佢哋條脊骨同腰骨特別脆弱?據聞,投訴嘅高官都有一個共同特徵,就係身材高大兼腳長。其實議事廳嘅座椅全部有得調校,議員有自己嘅座位,所以早已按自己嘅身高、體形調校座椅,但高官冇固定位置,唔識又或懶得調校座位,好可能因為上一手官員比較矮,將座椅校低咗,到身形高大嘅官員坐低時,一對長腿要屈住屈住,所以咪坐到周身唔聚財囉。

畀人鬧鑊甘 心情實唔靚

有人估投訴嘅高官係政務司司長唐唐同財爺鬍鬚曾,但知情人士一句:「佢哋有幾可嚟立法會呀!」就否決咗,咁其他身形高大嘅局長就有孫明揚、曾德成、邱騰華同埋周一嶽,大家不妨估吓係邊位。

老實講,啲高官嚟親立法會都畀議員鬧鑊甘,有時仲鬧足幾粒鐘,心情唔好加上坐得耐,梗係周身唔舒服啦。其實關座椅乜事吖!睇怕佢哋有反射心態,就係患上恐懼立法會症候群,平時坐喺局長樓梗係自在啦,但一諗起議事廳張座椅就諗到要受靶,唔單止腰酸背痛,簡直由頭到腳都痛。

秘書處話依家喺添馬艦起緊嘅新立法會大樓,落成時都要買過批座椅,所以佢哋會從善如流,參考高官嘅意見,選購一批方便調校高度嘅新座椅,等班腰骨比較脆弱嘅高官都唔使坐到腰酸背痛喎!