呢嗱，話說今年五月底，有位梁女士去診所睇醫生途中，突然覺得個肚好唔舒服，仲好想嘔添，佢本來都想頂住，諗住行多五分鐘去廁所解決，但最後都頂唔順。喺情急之下，佢快手快腳走到坑渠口將嘔吐物吐晒出嚟。

喺呢個時候，唔知邊度突然彈出三個食環署人員，以為佢哋會遞張紙巾或者會幫手Call白車啦，真係諗都唔好諗。食環署人員唔單止冇幫手，仲即刻發定額罰款一千五百元嘅告票，罪名係「隨地吐痰」。梁女士帶住病講到口水乾，食環署人員依然打死唔肯接納佢嘅解釋。

叮佢個鎯鎯，食環署真係告人唔使本。「嘔吐」同「吐痰」有乜分別，連三歲細路仔都分到啦，呢班食環署人員點會無知成咁呀？恕太一叮孤陋寡聞，真係要請教食環署署長卓永興，到底喺法律上「嘔吐」係咪等同於「吐痰」？

正所謂法律不外乎人情，冇錯，「嘔吐」同「吐痰」一樣會整污糟公眾地方，但係人都知嘔呢家嘢唔會擇定日子，唔舒服起嚟，話嘔就嘔。同隨地吐痰嘅性質根本係風馬牛不相及，點可以拉埋嚟講㗎？

叮佢個鎯鎯，家陣食環署下下濫發告票，擺到明係攞正牌打荷包啦！該署仲喺度死撐話執法人員只會喺有充足證據情況下，先至會向違例人士發出定額罰款通知書，如違例人士對票控有爭議，可以由法庭審理及判決。

你估小市民個個好似班官爺咁食飽飯得閒無事搵嘢做咩，無端白事被票控已經夠無辜啦，仲要上庭搞一輪，又怕唔知要唔要加倍罰款。所以好多人即使擺到明係被人屈，都會選擇啞忍，當破財擋災就算。

話時話，食環署成班惡吏執法打橫行，一向都為人詬病。呢嗱，早前有個喺中環擺檔十幾年嘅老擦鞋匠，一路以嚟都匿埋一個角落幫人擦鞋賺取微薄嘅酬勞，又冇阻到人，點知畀食環署一意孤行要票控阻街，真係冇人性。

最弊係食環署執法一時一樣，應管嘅唔管。大家試吓去鬧市街頭望望吖，啲易拉架擺到成行成市，比老擦鞋匠阻街一萬倍以上啦，又唔見食環署人員捉晒班街頭推銷員返去？

冇辦法啦，有卓永興喺度，食環署好似無王管咁。卓署長最好小心睇路呀，一個唔好彩趴喺街度，咁啱得咁蹺又畀食環署人員行過，見有咁大舊垃圾喺正路中間，一係就告佢喺公眾地方亂拋垃圾，一係就告佢阻住地球轉啦，叮！