04/08/2009

播放本新聞相關短片

政情:小白博客:做手術送八吋工具

一個全新的報上部落格,每日與你暢談社會至Hit話題,剖析問題所在。

公院送刀大酬賓

前排特區政府度咗個「六大優勢產業」出嚟救港,名副其實係香港亂噏,當中最笑爆嘴嘅係「醫療服務」,香港嘅醫療服務有幾巴閉,其實只要耐不耐睇吓醫管局嗰份《風險通報》就知,最新一期話喺去年十月至今年三月期間,公立醫院發生咗二十五宗嚴重醫療事件,有十三個病人有入無出,照咁睇,應該將《風險通報》改名為《死亡筆記之病人最終章》就貼切得多。

雖然係咁,亦唔代表香港嘅「醫療服務」冇優勢,因為公立醫院全年無休搞緊「做手術送大禮」酬賓優惠,只要做完手術有本事行出醫院,即送血管內擴張器、導管嘴、餵食胃喉,最大嗰件,有成八吋長,如果閣下夠位塞得落,遲啲送多個o靚模攬枕又點話呀。

網友回應

黃綠

科技日新月異,醫管局幫大家作最先進嘗試,包括內置手術刀,隨時幫你開刀!內置棉花隨時吸油!如果有內置電視,真係瞓喺床能知天下事。

CY甘

工時過長一直都係前線醫療人員面對最大的問題,醫管局應該好好正視問題!

山山

如果去旅行過機場X光機先知體內有把金屬手術刀,就認真未出發先興奮!

私兒

政府逼大家去私家醫院呀嘛,佢唔整多啲公院意外,大家點識驚啫!

出入平安

食物唔安全,空氣又唔好,道路又零安全,連醫院都係危險地帶……有事大家都係學古代人自愈好啲啦!唔係仲傷多兩錢重呀!

Lavina

前線醫護都好慘,有次入醫院兩個星期,見佢哋做到隻積咁,好明顯係唔夠人手。

小強

香港嘅醫療系統就嚟拍得上內地,周一嶽果然冇改錯名,每周都有鑊!

小肥

諗起都毛管戙,最慘係做多次手術拎番出嚟時,唔保證會唔會再留其他嘢喺裏面!

讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。

網址:www.sunsiupak.blogspot.com