04/08/2009

播放本新聞相關短片

政情:蘇澤光懶得理o靚模

早前嘅書展同啱啱啟動嘅動漫節都畀o靚模攻陷咗,書展嘅噴血寫真集賣個滿堂紅,一眾男粉絲為之瘋狂,依家亦有十幾歲小男生省吃儉用,寧願食少啲慳飯錢,都要喺動漫節買番個o靚模人形攬枕返屋企攬住瞓,都唔知呢位小朋友嘅家長有乜反應,但有樣嘢就好清楚,原來o靚模唔係無敵嘅,起碼有一個人完全不為所動。

雖然今年兩個活動,會展都旺丁又旺財,但係貿發局主席Jack蘇澤光就對o靚模零興趣。早兩日喺中環遇見佢去食晏,佢好認同今年書展同動漫展搞得唔錯,但原來除咗開幕之外,佢根本冇再落去巡場。對於班o靚模咁受大家歡迎,Jack就覺得呢個情況可以反映出香港嘅多元化,講得不知幾大體,方方面面都唔得罪。

咁有冇留意班o靚模呀?佢就好坦白咁話︰「無乜留意呀!」事實證明,呢班搞到電車男、龍友同青年人瘋狂嘅o靚模,扭晒蛇腰都冇辦法吸引到蘇主席嘅青睞。