新一屆議員每年可申領最多二萬六千幾蚊嘅實報實銷醫療津貼，用嚟買醫療保險或直接睇醫生都得。但有個別議員就唔懂得慎用呢筆公帑，竟然連買牙刷都向立法會開數，搞到秘書處要好似教細路咁，向全體議員發出通知，詳列有乜嘢開支唔算係醫療開支，依例唔可以向立法會開數，轉過彎警告呢位議員唔好再有下次！
究竟係邊位議員咁貪得無厭，連買牙刷嘅錢都想開公數呢？問咗一大輪都暫時未查到，有知情人士就話，為咗個人衞生，好多牙醫都會將用嚟教啲病人刷牙嘅牙刷即用即棄，然後開張收據當係賣咗畀個病人，相信只係有關嘅議員或者佢嘅議員助理冇睇清楚張單，以為成筆都係睇牙費用咁向立法會開數，唔係故意呃公帑。
不過，如果同類事件係發生喺啲高官身上，相信班議員肯定會發晒癲要求佢道歉辭職，邊理得你係無心之失定係有意呃錢。