喺豬流感肆虐下，今年暑期活動分外冷清，香港潮屬社團總會及潮州商會聯同攝影團體，舉辦全港中學生攝影比賽沖喜吓，潮州商會會長許學之尋日開記者會簡介比賽細則。講開影相，原來佢都係拍友。
許會長自爆中學時最愛攞住部相機幫同學仔影相，每逢學校舉行運動會、畢業禮，就會請纓出動私伙相機幫校長、老師及同學仔留倩影，相片珍藏至今。
但講到最珍貴嘅照片，就係一張放喺佢荷包幾十年嘅黑白舊照。唔通係舊情人？非也！相中人其實係六十年前許會長嘅畢業照。
話說當年十九歲嘅佢由潮州來港後，入讀當時位於鴨寮街嘅香港芝加哥無線電專科學校，學整收音機，科目屬當年最潮。可惜畢業後佢未有投身電子行業，而係跟爸爸從商，張畢業證書亦用唔着，索性將相片撕落嚟珍藏嘞。