富貴黨主席Miriam劉健儀即將帶隊去西藏旅行，為該黨未來發展路向搵靈感，但西藏空氣稀薄好易缺氧，人人都怕患上高山症。富貴黨舊年立法會選舉後百廢待興，為咗Miriam等一班大哥大姐安然無恙，有黨員就訂咗一批預防高山症藥物「紅景天」，分派給各個隨團黨友，預早食定出發，Miriam大讚呢位黨友夠細心。
為進一步減低行程風險，富貴黨計劃先飛青海省嘅西寧市，慢慢適應吓高山氣候，然後再坐青藏鐵路到西藏，向高原進發。正因為咁安全，加上食好住好，五日行程旅費就要二萬元，拍得住歐洲旅行團價錢。
但話時話，五日遊西藏實在太短，一般旅行團最短都要八日，各位大哥大姐小心連高山氣候都未夠時間適應，就算適應咗都趕唔切欣賞風景就要落山。