面向國際化係推動國家進步嘅重要環節，年輕人嘅視野要同世界接軌。佢話當年喺美國留學，堅持「三不政策」：不到唐人街、不吃中國餐、不識中國人做女朋友，以融入美國社會，令佢好快明白當地嘅社會文化。

可能因為政府喺年底就會推出政改諮詢，坊間唔少聲音話要加入民主元素，所以Ronnie嘅分享當中都觸及民主。佢話依家有種三人成虎嘅現象，就算一樣嘢係假嘅，當畀人講咗好多次之後，講講吓都會變成真。佢直接用民主嚟做例子，問班學生係咪覺得講多幾次民主好，最後民主就一定係好喎，但佢未等啲學生回應就自答話唔一定嘞，仲話就算唔知民主係咪好，佢都覺得大家仲係需要民主，只係點做到民主或用乜嘢形式去做，咁就完全係另外一回事嘞！

佢又以親身經歷教學生千祈唔好立亂跟風，話當年美國好興嬉皮士，全班得佢一個人堅持唔做，保持短髮、堅持日日沖涼同着鞋出街。可能嗰陣會有人覺得佢老土，但最終呢班「好潮」嘅嬉皮士，都要放低嬉皮乖乖去讀番個MBA，間接證明佢當日「唔入流」嘅堅持係正確。

叫學生唔好盲目跟風

咁若果一啲大家都係覺得好嘅嘢呢？佢話要小心背後嘅代價，冇人會話自由唔好，但佢有個朋友不幸喺一次械劫案入面中槍身亡，間接因為美國使用槍械過於自由而死。

泛民主派堅持要二○一二年雙普選，聽完Ronnie呢席話後，似乎係暗寸泛民不斷吹噓民主嘅好處，但咪以為講多幾次就真係好嘢，舉咗咁多例子出嚟，都係想班學生睇清楚啲，咪立亂相信之餘，仲唔好盲目咁跟風追捧。