商務及經濟發展局局長劉吳惠蘭曾指商人好奸好險，其實啲商人好精好叻好聰明好有智慧就真！o靚模以牙刷刷牙，牙膏滴到乳溝，有人指意識不良，像筆者這樣正派的人，只聯想到古人詠牙刷的一首詩，正氣到暈：惟口啟羞，亦復含垢。積垢毀齒，大開狗竇。有物拭之，晨興之候。短小精悍，誓殲群醜。

所以話o靚模刷牙無罪，道德佬亂想有穢，判罰公立醫院洗腦！留件手術刀畀佢歎吓！等佢知道乜嘢叫做「衝動的懲罰」！

講番商人有智慧個筆，有知識不同有智慧。前輩分析得好，知識是收集事實的過程，而智慧是對這些事實消化後的運用。「消化」這個字很重要，資料未經消化是廢料；啲高官推行新政，例如諮詢「改善空氣質素」，之所以淪為假大空，正因為連消化的過程都未做好。

你睇吓啲商人幾有智慧，知識是囫圇吞棗，智慧是觸類旁通，啲商人懂得食住上，寫真集大賣，再斬四両，人形攬枕一個成六百元賣到斷市，於是搞預訂送o靚模攬枕上門，免電車男尷尬，這不是商機智慧是甚麼？