融樂會總幹事王惠芬表示，少數族裔喺教育、就業及社區支援等方面遇到唔少語言障礙。好似話依家大約有萬多個少數族裔人士在學，但係每年只係得唔多過十個人可以入大學，得咁少人可以做天子門生嘅原因，完全係因為佢哋嘅中文水平未達標。

咁就奇嘞，負責執行《種族歧視條例》嘅平機會死咗去邊？王惠芬話喺條例嘅草擬期間，試過兩次約見主席鄧爾邦，要求平機會盡早製作教育實務守則，以消除教育制度中對非華語學生嘅不公平現象。你估鄧爾邦又點講呢？三個字──「唔得閒」，就咁一口拒絕。

叮佢個鎯鎯，鄧爾邦成日用公帑出差周遊列國、寰宇風情就得閒，要佢做番分內事又話「唔得閒」，要數縮骨卸膊，佢認第二，冇人敢認第一。

王惠芬又踢爆鄧爾邦把口就話目前嘅教育制度對少數族裔唔公平，仲拍晒心口話會向教育局反映問題，查實佢連制訂教育實務守則嘅時間表都冇，簡直係吹水唔抹嘴。

鄧爾邦除咗吹水叻之外，佢嘅另一強項就係面皮夠晒厚。你睇吓佢醜聞多到冇朋友，數起佢啲衰嘢，真係成匹布咁長！佢坐飛機要商務客位，住酒店要大使套房，擅自以公帑購買「超豪」人壽保險等等，平時行行企企乜都唔理，一有乜着數就(舌累)到盡。

嗱嗱嗱，人權監察總幹事羅沃啟就講得啱嘞，佢話鄧爾邦只係在乎加薪，政府成日話鄧爾邦唔走得，怕影響運作，其實係佢阻住地球轉就真。立法會議員劉慧卿聽到平機會就把幾火，炮轟鄧爾邦做嘢手軟腳軟，審計報告搞到一鑊泡，完全發揮唔到功能，要去聯合國炮轟佢。

不過唔好話太一叮潑冷水，咁做都係嘥聲壞氣㗎咋，睇吓就算立法會炳到鄧爾邦七彩，仲表示「極度遺憾」添，咁又點吖？佢咪當歌仔咁聽過算數，你想佢會引咎辭職，真係唔使旨意呀！既然有特區政府包庇，佢做山寨王又做得咁過癮，梗係繼續賴死唔走，撐到明年一月合約屆滿為止。

唔好以為鄧爾邦搞掂埋手頭工作至走咁有手尾，有人踢爆，佢之所以喺度磨爛蓆，完全因為睇錢份上，為咗百多萬元嘅約滿酬金，袋袋平安之後，唔踢佢都會拍拍屁股走人啦。

叮佢個鎯鎯，好似鄧爾邦呢啲咁嘅人辦，真係百年難得一見，全世界都搵唔到幾個，真係睇見都眼冤。難為立法會議員對於未來公開招聘平機會主席一職，仲希望政府搵個有能力嘅人。

算吧啦，乜佢哋唔知公營機構董事局成員或委員嘅委任，從來係黑箱作業嘅咩？市民無權過問，走咗一個鄧爾邦，話唔定下個山寨王面皮一樣咁厚，下下要同鄧爾邦平等機會，搭少次商務客位、住少次大使套房都唔肯呀！