港區全國人大早前去山西考察，全國人大常委范徐麗泰話，起初擔心山西煤礦場內沙塵滾滾，臨入場前戴定一雙白手襪保護雙手，誰知煤礦場鬼咁現代化，挖煤不經人手，全部機械化，於是「白手襪」用唔着，離場時依然係白雪雪喎。
講起山西之行，范太顯得眉飛色舞，此行佢參觀咗潞安屯留煤礦及煤基合成油示範廠，坐住防爆汽車實地巡視煤油園區，認真過癮。山西煤礦一直有安全問題，逼到有關單位一定要做啲嘢，近日展開淘汰戰，將原來近萬間大小不一嘅礦場，淘汰到只剩二千六百間，未來會再精選一千間，目的係趕絕渾水摸魚嘅「細場」。
范太此行順便參觀埋有佛國聖地之稱嘅五台山，入鄉隨俗去五爺廟拜神，得方丈送咗條佛珠畀佢結緣，佢開心到戴喺左手，唔捨得除低哩。