近日同泌尿科專家、行政會議成員「金刀梁」梁智鴻傾開，原來佢以前都有食冬蟲草嘅習慣，但近年炒得太貴，依家冇食嘞。本身係世界家庭醫學會亞太區主席嘅馬會大董李國棟就話，暫時仲未有文獻證明冬蟲草嘅藥用價值有幾高，所以如果冬蟲草有假嘢，索性乜嘢藥材都唔使食，因為保持均衡飲食先係最重要。

港區全國人大代表馬豪輝同太太早兩晚出席一個晚宴，馬太話以前成家人都有食冬蟲草，周不時用六、七條嚟燉湯，但近年因為家人嘅飲食習慣改變咗，依家食嘢會盡量清淡啲，所以連補品都可以食少啲喎。

馬律師近來成功減咗三十幾磅，原來係控制飲食有功。