賣攬枕遏歪風

有個o靚模出巡期間被人摸Pat Pat，真係我見猶憐，不過唔係咁，睇怕都分唔清佢係Lavina定Rainbow定係Annie.G！唉，小白老弟老早講過，鄭融蒙難搶佔報紙頭版之後，鹹豬手事件將會無日無之，點樣可以遏止呢陣歪風呢？好簡單，目前受害嘅o靚模藝人都冇出人形Mary攬枕，不妨整幾個正面後面側面唔同款，滿足咗麻甩仔嘅需要，類似事件應該可以大大減少。

講開又講，o靚模一個書展可以吸金百萬，原來錢係咁易搵，女生日日比堅尼騷胸趷籮，男生可以做經理人倚靠o靚模維生，如果本地幾間大學識得諗，一於全力開辦「o靚模工商管理系」，如果生意好的話，又可以升格為「香港o靚模專業進修學院」，甚至乎索性正名為The E Cup Baby University of Hong Kong，好過開學店賺副學士錢啦！

網友回應......

Cyril

書展冇去，尋日去動漫節至知啲o靚模有幾勁，青春無敵，幾好睇吖，但係露還露，千祈唔好為咗賺些少錢蝕底咁蠢。

匿名

之前未聽過呢個Melody嘅名，依家知la。

卜卜

鄭融都有份，o靚模點會走得甩吖！

思思

依家周街都係龍友，買部數碼相機唔係學影相，只不過係用嚟親近女仔，一有背心少女出現個個流晒口水，原形畢露，o靚模唔係問題，反而要嚴打呢啲龍友至係呀！

Kenneth Leung

真係世風日下，o靚仔愈來愈猖狂，不過啲o靚模都要負番啲責任，成日着咁少布，有引人犯罪之嫌，希望佢哋好自為之啦。

官UN啲ER

相信強吻o靚模事件的降臨，只是遲與早的事！

may

o靚模已經日日娛樂頭條啦，依家仲想做埋A1頭條，真巴閉！

匿名

o靚模冇罪喎，佢哋都係搵兩餐啫，最唔鍾意啲人成日假正經，又要睇又要鬧。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com