無綫之前安排一星期一集嘅《大咕窿》，見收視唔錯就搞到一至五晚晚播，今個禮拜三播最後一集。環保組織地球之友六月底陸續收到市民投訴，指個節目好唔環保，原本諗住約埋幾間傳媒，古仔聽日至見報，殊不知畀另一個組織環保觸覺攪亂陣腳，咁啱又想講同一個議題。
面對夾擊，無記解畫話明白到環保同善用資源嘅重要，所以用過嘅發泡膠會重用、重用再重用，製作成假山石雕同雪粒等。
地球之友高級環境事務主任歐詠芷話，《大咕窿》只係電視台唔環保嘅冰山一角，以二十三集，每集用六塊發泡膠推算，已耗掉二百七十六立方米發泡膠，體積等如兩架雙層巴士咁大，地球之友係本港唯一有提供發泡膠回收的機構，但從來未見過無記送來發泡膠。
環保觸覺尋日亦加多一腳，發稿話《大咕窿》一晚已用咗等同四萬二千個飯盒體積嘅發泡膠，個會上周五係Facebook發起「反對無綫假環保，要求停播大咕窿」嘅群組，短短兩日已有六百人加入。