日前遇到有「白鴿」股神、本身喺滙豐做嘢嘅立法會前議員「單雞」單仲偕，當然捉住佢問吓點睇後市？佢先係自嘲只係低級員工，冇乜大笨象嘅內幕消息，跟住仲自爆早前佢都跌眼鏡，捉唔到中港股市呢轉強勁升浪，賺少咗好多錢添！股神都睇錯市，呢次真係一殼眼淚咯！

雖然係咁，但佢對大市嘅前景亦有一番理論。大部分人認定全球經濟冇可能「V」形反彈，但對於係「Ｌ」徘徊谷底，定係「Ｗ」形大上大落就意見紛紜，不過，單雞話佢比較相信一個美國朋友嘅分析，認為今次復甦會係「Nike」形。

何謂「Nike」形？即係好似個剔號咁跌得快、升得慢，有排先至旺番，因此單雞認為港股最近升破二萬點，已經升過龍，嚟緊就算唔會大跌，進一步上升空間有限，長線投資冇話唔得，短線炒作就好難有肉食嘞！呢番見解，信不信由你。