陳健波係土生土長香港仔，當年預科畢業後，不斷以半工讀形式，努力進修，考取行內專業資格，一步步爬出頭嚟，所以佢一直相信香港嘅教育制度，仲反對啲朋友送仔女去外國讀書添！點知回歸十二年，主管教育班官員竟然可以將陳健波由信奉者變成信心盡失，真係要寫個服字。

陳健波尋日講述親身經驗，佢話大仔一直冇心機讀書，會考成績唔見得人，於是轉換環境，送佢去美國讀書，點知大仔成個人脫胎換骨，讀書勤力，科科攞A不在話下，仲潛能盡現，但係香港嘅學校老師，從未發現阿仔嘅音樂天分，而阿仔依家喺合唱團唱男高音，叻到可以同成班同學參加州際比賽，當地報紙都有報道消息，事件反映香港嘅教育制度何等不濟。

辭任保險公司總裁

雖然細仔讀書比哥哥叻，入讀傳統名校，但一樣讀得唔係咁開心。吸取大仔嘅教訓，陳健波二話不說，今年就幫細仔轉去讀國際學校，等佢適應咗，就送去外國浸鹹水，即係全盤否定香港嘅教育制度，要倒吊「填鴨」咁話。佢慨嘆一直信錯香港嘅教育制度，時下青少年濫藥、愛口靚模，睇嚟並非偶然，加上在職貧窮嚴重，基層向上流動階梯愈嚟愈窄。佢仲話香港投放唔少錢落教育，點知都搞成咁，同揼錢落鹹水海冇分別。負責教育班高官，聽到未？

講開又講，陳健波舊年進身立法會後，公私兩忙，無法兼顧，早前同任職行政總裁嘅德國保險公司商量後，決定壯士斷臂，由九月起辭任行政總裁，轉任顧問。