如今唔單止女人要瘦身，男人亦要減肥，總之，男人意識上嚮往「老公豬」，行動上卻唔想輸──最好有六塊腹肌，唔似韓國歌手阿Rain都要似C朗拿度。筆者少習洪拳，今為口腹奔馳，疏於練習，肚腩又成豬！真想狠狠地學法國總統節食，加上晨操晚練的跑步，可惜背後又冇個咁索嘅夫人，有鬼動力咩！

最近在歐洲巡迴演唱的麥當娜，於倫敦夜蒲時，被人拍下雙臂如老樹枯藤，青筋暴現，此乃健身過度之弊也！

女人貪靚，根本不受時空環境限制。筆者翻看歷史，見到二戰期間各國都面臨嚴重的物資匱乏問題，對於愛美的女士來說，絲襪成了奢侈品，但有個商家竟想出「絕世好襪」：一九四一年七月，英國克羅伊登一家商店，開始給顧客畫襪子。來光顧的女子，其玉腿經過塗色的處理後，幾乎可以與真的絲襪相媲美。商店還提出了一個廣告語：「我們的絲襪不會抽絲。」幽默的背後，有無奈的時代告白，同時也看出人窮則變的創意！

貪靚與減肥，已成為女人終其一生剪不掉的臍帶與夢魘。美國女人，尤其像娜姐這些年過半百的，肯定受到珍芳達的影響──苗條是健而美！麥當娜如枯藤的手臂只能告訴大家，刻意求瘦反而弄巧反拙！成功減肥又如何？

我瘦故我在，我肥就係罪？姊妹們，苗條是場打不贏的仗！