冇錯，講緊嘅就係上水河上鄉非法傾倒建築廢料事件嘞。塱原濕地鄰近一塊萬幾呎嘅私人土地，七月中開始突然間有上百架泥頭車闖入去傾倒廢物，菜田一夜間變咗堆填區。有居民懷疑部分廢料嚟自建築署喺和合石嘅地盤。

政府尋日話，河上鄉傾倒嘅建築廢料證實嚟自和合石建築署地盤，承建商未有遵守運載紀錄制度，環保署已邀請一名泥頭車司機協助調查，如有足夠證據會提出檢控。當局會繼續密切監察事件喎。

叮！事件曝光已經半個月有多，環保署等部門亦去過現場N次；環境局副局長潘潔上個禮拜話，如果外判承辦商涉及非法傾倒泥頭，可能會被扣分同喺接辦政府工程名單除名，泥頭車司機亦可能被釘牌，但係一直搵唔到「元兇」。

環境局局長邱騰華早兩日扮晒叉燒，話政府十分重視保護農地，重申環保署等部門已採取適當改善措施。政府官員啲騷做完一場又一場，點知原來得個齋噏，拖得就拖，玩咗一輪「捉唔到賊就告業主」嘅把戲，等業主無啦啦嚇餐死，到依家至話完成初步調查，確定非法傾倒嘅「元兇」。旨意呢班官員做嘢，蛇都死啦。

呢嗱，河上鄉非法傾倒嘅泥頭仲未清，屯門早排又爆同類個案。寶塘下村私人農地同政府土地畀人用嚟堆放泥頭，甚至開非法洗車場。堆放面積足有四個足球場咁大，唔止堵塞溪澗，連路都封埋。

居民向環保署等部門投訴過好多次，執法部門居然因為未能人贓並獲而無法檢控，拉唔到人不特止，連泥頭都未清過，一落雨就水浸。政府懶懶閒，有法唔執，執法唔嚴，根本就係變相縱容非法傾倒。

叮！私人土地變垃圾堆填區，政府部門一味互相扯貓尾，將責任推晒畀市民。好似河上鄉呢單嘢咁，當局當初搵唔出始作俑者，就賴無辜受害嘅業主任人亂倒泥頭，仲要佢哋將土地回復原狀，唔係就會檢控。執法嘅是是但但，違規嘅梗係肆無忌憚啦。

太一叮諗極都唔明，政府任人周圍傾倒泥頭都唔去理，到底為咗乜？係噃，唔通個「蚊型迪士尼」畀人鬧得多，當局要搵土地擴建，諗住將新嘅主題區起喺上水？廢物堆填區上面起「野礦山谷」，果然係「全球獨有」噃！剩番嘅地方，唔志在搞埋個「泥頭主題公園」啦。叮！