由福建幫頭領楊孫西、盧文端同資深全國政協委員高敬德牽頭嘅中國和平統一促進會香港總會，尋日舉行成立慶典，好多政界猛人嚟撐場，例如全國人大常委范徐麗泰、行政會議召集人梁振英、「領呔大王」曾憲梓、「機器大王」蔣震同民政事務局前局長何志平等，原來佢哋都係總會嘅首席顧問，事前冇人知，尋晚變晒做「神秘嘉賓」。
已故全國政協副主席霍英東嘅二仔霍震寰亦有心為兩岸關係盡一分力，擔任監事長，睇嚟總會真係想有一番作為喎。
中央官員喺慶典上講，和統會香港總會未來將會擔當橋樑角色，促進兩岸經貿、文化交流；高敬德亦致辭話，總會將會做好六件事，好似組團訪台、推動港台居民免簽證，同定期搞「和平發展論壇」等。
