立法會議員袋巾傑嗰對孖仔今年咁啱升讀中四，搞到佢憂心忡忡，思前想後，最終決定安排對孖仔試讀一年中四，然後再轉到英國修讀餘下嘅高中同大學課程。咁即係叫兩隻白老鼠大逃亡，擺明係對新學制投下不信任票。

佢仲話過到英國讀書，話唔定因為成績好可以跳級直升中六，慳番一年時間讀中五，加上大女已喺英國準備升讀大學，可以照顧兩個細佬，叫做有個照應。呢幾日佢同太太就會帶對孖仔去英國探路，試吓上當地嘅暑期課程，熟習吓英國嘅讀書環境。

講番袋巾傑個大女，已經選定修讀政治、心理同社會學，取得學位後再選讀其他學科。佢對大女嘅想法深表認同，仲認為十八、九歲一開始就修讀法律會太專，可能對社會事務認知度不足，記得當年佢入港大讀法律時，都遇過同樣問題，但好彩有機會參加學生會事務，以補不足之處。