呢場官司嘅訴訟費銀碼究竟要幾多位數字真係好難講，早前立法會同政府拗數，立法會堅持政府有責任包底，但政府就認為立法會應該先動用儲備應戰。期間新世界方面除原有嘅本地資深大律師兼前立法局主席施偉賢外，仲喺英國請多咗位著名御用大律師Dinah Rose來港幫手，令立法會亦被迫加碼招兵應戰，財政壓力進一步加重。

梁展文案影響憲制發展

好彩立法會最終都喺英國請到屬於殿堂級嘅英國御用大狀Anthony Lester來港助陣，佢早喺六三年就攞到大律師資格，七五年升做御用大律師，係著名嘅憲法同人權法專家，最巧合係佢同新世界聘請嘅Rose，都係嚟自同一間律師行，但地位同資歷就高對方幾班。

據聞佢仲係以友情價幫立法會，律師費連機票食宿「全包宴」都唔使一百萬港紙，以佢嘅殿堂級身份嚟計絕對超值，仲稍為紓緩咗立法會嘅財政壓力，可以專心同新世界一戰。有咁殿堂級嘅金牙大狀幫拖，調查梁展文事件嘅專責委員會主席李鳳英可以鬆一口氣，唔使為錢頭痕嘞。

有法律界人士分析，Lester近年已處於半退休狀態，就算有錢都未必請得到，估計係因為呢單案對香港憲制發展影響深遠，一旦贏咗就可以名留青史，加上外界普遍估計立法會嘅勝算較高，所以佢先會願意以友情價出山。

但亦有人指Lester年事已高，轉數比當打時始終有差別，估計佢主要係出橋居多，最後上庭抗辯嘅都係由麥高義做主力，同新世界一樣係一老（施偉賢）一少（Rose）搭檔，以律師團陣容計只係打成平手。