本港近排發生多宗涉及沙井嘅嚴重意外，七月中沙田大圍村一名四歲男童誤墮進行緊渠務工程、但懷疑冇設置圍板嘅沙井受傷。事隔個幾禮拜，灣仔又發生沙井沼氣差啲奪走兩條人命嘅事故。政府無監無管，「死亡陷阱」無遮無掩，遲早爆大鑊。

前日凌晨，兩名渠務署外判工人喺灣仔勘查地下渠道嗰陣，其中一人懷疑跣腳跌落沙井底，暈低喺污水度，另外嗰位冒死落井救人，結果兩個人都吸入沼氣。好彩救人英雄死撐住唔放棄，緊抱工友等待救援，十五分鐘後終於畀消防員救起送院，其中墮井工人情況危殆。

夏天高溫，沙井容易積聚沼氣，吸入少少隨時可能暈倒，增加咗渠務作業嘅危險。有工業傷亡權益組織人士話，冇佩戴安全儀器落沙井救人等於攞條命較飛，隨時中沼氣毒窒息，進行工程前應做足安全措施，防止意外。

叮！出事嘅唔係做街坊生意嘅通渠佬，而係渠務署嘅外判工人。開工冇戴安全帶，有人誤墮井底，落去救人嗰陣又冇做沼氣測試，呢次冇搞出人命，不過係好彩咋。表面睇，事件懷疑係工人操作不當所致，但渠務署唔單止安全操作教育唔到位，對現場作業更缺乏監管，先令到沙井事故出完一單又一單。

唉，渠務署班官員知唔知自己應該做乜㗎？有名你叫，渠務署梗係要保障渠道系統安全暢通㗎啦。依家啲渠唔通，周圍都有水浸黑點不特止，仲增加咗唔少「死亡陷阱」添，不如索性改名做「攞命署」罷啦。

叮！本港近年每逢大雨循例水浸，包括上環嗰條一落大雨就有鮑參翅肚隨水漂嘅「永樂河」在內，原來全港共有二十二個水浸黑點，淨係大埔呢個重災區就佔咗六個。其中洞梓路早喺九四年就被列入水浸黑點，拖咗十五年，問題都好似巴士阿叔話齋：「未解決！」一落大雨，居民都只能靠涉水出入。

就算有防洪工程，渠務署一樣拖得就拖，慢過烏龜。好似大澳永安街旁邊嗰個河道築堤防止海水倒灌工程咁，要等到二○一一年至有望搞掂，仲有冇遲啲呀？

渠務署管渠渠唔通，管沙井又變咗製造陷阱，做嗰瓣衰嗰瓣冇樣掂，直頭好似跌咗落冇蓋沙井，中咗沼氣毒咁，神志不清，對安全監管放軟晒手腳，工程施工拖得就拖。漠視沙井危機，最終累人累己，咪話唔提醒渠務署署長劉家強呀，如果再出多單意外，靠害無辜市民，太一叮一定會叮爆渠務署個鎯鎯㗎！