尋日中午朱玲玲相約老公去灣仔君悅酒店撐枱腳，咁啱得咁蹺，酒店搞緊一個大型座談會，城中大孖沙同多位政協常委等名人雲集，朱玲玲前夫霍震霆都係座上客。

喺下晝一點半，見穿上一件火紅色恤衫、戴LV太陽眼鏡嘅朱玲玲同老公並肩離開，朱玲玲派頭十足，頸上戴上圓圈形碎鑽頸鏈，耀眼到極。可惜朱玲玲比前夫提早半粒鐘離開，兩人同場不相見，呢啲係咪叫做「無緣對面不相逢」呢？

之後，見到霍公子同班政協食完午宴後步出，佢全程保持微笑，冇透露剛才有冇巧遇前妻。問佢參加座談會有乜感受，佢話會議旨在讓大家聚一聚，交流吓意見喎。