做和事老嘅新界鄉議局建議咗十幾個選址畀正生書院遷校，但政府仍堅持遷入梅窩，梅窩居民嘅態度仍企硬反對，仲開始升溫，計劃喺嚟緊嘅周日遊行抗議。
係咪要搞到官逼民反？當然大家都唔想，於是鄉議局主席劉皇發同副主席張學明尋日就約咗署理政務司司長、教育局局長孫明揚食飯傾吓。孫公離開時話大家食飯主要係想研究解決正生書院遷校問題，暫時未有解決方案，但已經有好多人幫手做緊嘢，仲呼籲大家一齊諗吓辦法。
但係梅窩居民準備周日遊行抗議喎！孫公就語重心長話：「唔好行咁多啦，大家坐埋傾吓解決事件啦！」
好明顯孫公想為事件降溫，但憑乜嘢可以撲熄梅窩居民嘅怒火呢？唔通學似啲G模咁，周街派雪糕就掂？咁就要睇吓孫公派乜嘢「雪糕」嘞！
依家鄉議局有幾個大炸彈要拆，除正生書院外，仲有興建廣深港高鐵涉及嘅收地問題，身兼行政會議成員嘅發叔擔唔擔心畀炸彈炸親？發叔笑笑口話：「我係拆彈專家，都係幫政府同居民做嘢啫！」