港區全國人大代表去完山西考察，返港冇耐嘅人大楊耀忠對呢次山西之行讚口不絕，驚嘆當地不單止天然資源豐富，而且係一個文化寶藏，事關當地佛寺多，文物保育又做得十分之好，但佢事前抱有厚望嘅山西特產刀削麵，就令佢大失所望。
山西係「血煤之鄉」，楊校長話人大考察團當然有參觀煤礦啦，但佢哋只係留喺控制室入面，睇住個閉路電視，加上參觀嘅係國營煤礦，保險措施十足，所以絕對安全，唔能夠同私營、小型嘅煤礦相提並論。
佢又大讚山西有數以百計嘅佛寺，又有非常之靚嘅平遙古城，佢仲話唔講唔知，原來中國第一位銀行家都係嚟自山西，總之山西應該大搞旅遊業啦，所以佢提議加強對外宣傳。但令佢覺得美中不足嘅，係山西刀削麵認真「削」咗啲啦，啲麵質麻麻哋，搞到佢失望而回。