中大尋日公布嘅民調指受訪者畀今屆立法會議員嘅評分唔理想，已經唔係議員嘅富貴黨前主席田北俊都有留意到，仲好感慨話：「我唔奇怪選民會失望，因為班直選嘅淨係識批評，但又冇有效改善（施政）方法。」
田少發現傳媒今年少咗報道立法會大會嘅質詢同動議，話唔知係咪議員質素差咗，問嘢唔到題定係冇做足功課喎。佢認為今屆有雷曼同梁展文事件，絕對唔會缺乏議題，所以問題出喺議員、官員嘅質素同取態上。
但係佢對黨友嘅表現就口下留情，話富貴黨嘅議員由以前十個變到依家得三個，分工上難免有困難，仲趁機呼籲已另起爐灶嘅經濟動力嗰四個前黨友重新歸隊添！
尋日佢上某公仔箱做嘉賓，節目由佢嘅情史、家族關係講到富貴黨、旅發局工作，主持人仲問佢係咪有過四段情，佢笑言：「得四段咁少？我咪好瘀。」唔知田太聽到會唔會呷醋呢？