秘書處尋日向全體議員發出題為「中區政府合署的無煙政策」嘅電郵，提醒啲喺政府合署西座設有辦事處嘅議員同佢哋嘅助理，政府合署大部分地方都已禁煙，只有七樓露天停車場嘅細細個方格可以煲煙。為免有人博大霧扮唔識路，電郵仲特別附上指定吸煙區嘅地圖同現場照片。

今次秘書處重提舊事，肯定係有人曾經違規煲煙，頭號疑兇自然係成日煙不離手同唔守規矩嘅「長毛」梁國雄！但細問之下，原來今次畀人投訴嘅唔係長毛或其他議員，而係一名不知名嘅議員助理，投訴人係另一名唔食煙嘅議員助理。

疑三樓工作室出事

問過幾個資深議員助理，部分本身都係煙民，證實位於西座五樓嘅建仔、四樓嘅白鴿黨同三樓嘅部分草根派泛民議員，都有助理吸煙，但佢哋都好清楚有關規定，每逢煙癮起都會坐電梯落樓下解決，冇聽過有人偷雞喺辦事處內或露天停車場煲煙；加上佢哋日日喺嗰度返工，一旦違規好易畀人點到相，應該冇人會咁蠢。

綜合各方分析，比較有可能出事嘅係位於三樓嘅一間工作室，經常會有嚟自其他地區辦事處嘅助理嚟開會或製作示威物品，佢哋未必熟悉政府合署嘅禁煙政策，可能會有意無意貪方便喺房內煲煙，或一去到露天停車場就以為全場都食得煙。

無論實情係點，但竟然有議員助理知法犯法，呢鋪認真羞家，希望佢哋咪再犯，否則搞到政府有藉口拉人封舖、發通緝令又或下逐客令趕晒班議員同助理走，以後就冇得再喺政府合署內裏應外合搞示威活動㗎喇！