據「東方報業民意調查」顯示,有四成七受訪者期望政府下半年優先處理經濟民生以及就業問題;三成一認為係青少年濫藥問題;一成二話係豬流感停課安排;至於希望政府處理粵港合作發展停滯不前嘅問題,就佔咗百分之六。
依家有二十萬人打爛飯碗,仍然有份工做緊嘅,好多都要減人工兼放無薪假,終日擔驚受怕,唔知幾時會輪到自己。
對於一班高官嚟講就好唔同嘞,佢哋做又三十六,唔做又三十六,要佢哋凍薪好似拮佢一刀咁,個個身在福中不知福,試問點會感受到小市民係幾咁水深火熱吖?
依家香港嘅失業率係咁升,已經處於四年新高,面對經濟問題,四成二受訪者認為港府喺促進經濟方面有缺失,未能尋找經濟新增長點;兩成四直斥當局冇保就業、撐企業;兩成一質疑政府對金融海嘯束手無策。
弊在財政司司長曾俊華好似借咗聾耳陳隻耳,就算小市民嗌到拆天都冇用,佢一於好少理,繼續好官我自為之,以為單靠把口吹下水就可以救市,真係懶到冇朋友。
其實何止經濟問題束手無策,係人都知依家青少年濫藥問題係幾咁嚴重,連返學同埋去沙灘都要索K。真係世風日下,但係當局一味只係識做騷,喺打擊濫藥上冇通盤方案。
對於當局打擊濫藥手軟腳軟,有三成二受訪者話禁毒工作最失敗嘅係冇打擊毒品源頭;三成話冇加強刑罰,欠阻嚇性;兩成七批評當局嘅禁毒工作係臨急抱佛腳,冇周詳計劃。
正如城大公共及社會行政學系副教授葉健民所講,政府處理社會危機嘅弱點,就係諮詢期拖得太長,再加上弱勢政府施政舉步維艱,令官員做事過分小心,一遇到問題就採取拖得就拖嘅態度,結果令問題更加惡化。
事實上,政府過去邊次有效處理社會危機?對唔住,太一叮諗爆頭都未諗到。難怪有三成九受訪者直指係官僚作風,施政緩慢所導致;三成狠批當局冇對症下藥解決問題;兩成二直斥弱勢政府難以推行政策。
正所謂弱勢政府百事哀,其實下半年嘅計時炸彈一樣多到嘔,例如最低工資、公平競爭法等等,涉及各個社會階層,而且好惹火。如果當局繼續等運到,唔諗辦法拆彈,爆起上嚟唔係講玩(口架),到時唔使太一叮出手,成班懶官嘅鎯鎯即刻爆晒!