中大心理學系講座教授張妙清近日出咗本名為《登上巔峰的女性》嘅書，當中有訪問全國人大常委范徐麗泰同立法會議員「蘇菲」梁劉柔芬，尋日仲請兩人即場分享點樣平衡家庭同事業。雖然兩位阿太風頭唔及班o靚模，但話題絕對有爆炸性。
話說范太當年打工，曾遇到個思想傳統嘅男上司，升職時偏袒男同事，佢唔忿氣，走去問老闆自己係咪力有不逮，老闆回話：「你（范太）賺錢買花戴之嘛，使乜咁緊張。」佢自覺被歧視，即時寫咗篇長文「申冤」，解釋過去幾年嘅工作成績，雖然爭取升職行動最後失敗，但佢冇後悔講出心聲。
蘇菲都話童年唔得寵，後來嫁作人婦，奶奶同老公梁孔德都反對佢做嘢，偏偏佢係天生工作狂，極力游說老公「開綠燈」，後來躋身政商界成為女強人，每次工作有乜做得唔好，老公都會「批判」佢，佢笑言聽得多真係覺得好煩，惟有當佢「唱歌」。