喺○八年殘疾人士奧運會中勇奪男子二百米跑金牌嘅蘇樺偉，趁住書展出書講金牌背後嘅比賽點滴。佢前日搞新書發布簽名會，立法會體育、演藝、文化及出版界議員霍震霆都去撐場，原來兩人早有交情。
蘇樺偉憶述有次代表香港去希臘比賽，因為當地食物質素麻麻，一行人都冇乜胃口，當時同行嘅霍公子得悉後，竟然自掏荷包請大家食中國菜，令佢留下深刻印象。
咁霍公子有冇諗住出番本講運動嘅書呢？佢話最近想喺家鄉開辦博物館，所以摷番唔少舊相出嚟，當中一張係佢同爸爸霍英東喺某屆東亞運動會時嘅合照，望住張相勾起唔少美好回憶，但佢笑言：「運動方面我未必咁有天分，加上我嘅係小故事，茶餘飯後講吓就得，出書都係留番畀後生啦。」
