前問責高官王永平離開官場後，不時評論時事，講嘢一針見血，最近仲加入城大教公共及社會行政學系，下學期開始教碩士課程，尋日佢更向難度挑戰。
平叔尋日喺書展講故事，唔知係咪佢平時講嘢太嚴肅，就算同班小朋友講有關十二生肖嘅《中國動物故事》，開始時好似提唔起小朋友嘅興趣，於是佢放下身段，不時扮吓動物講嘢，又拉埋小朋友幫手講古仔，終於帶番起個氣氛。
佢不時考吓小朋友一啲動物嘅英文串法，班小朋友個個都識答，氹得佢好開心，話小朋友嘅反應仲好過一啲大學生喎。最後影大合照時，平叔已經同班小朋友打成一片，竟然有人叫佢做o靚仔，仲有個小朋友同佢爭大會畀佢嘅紀念品添！
