高院今日會審理白鴿黨立法會議員黃成智喺立法會選舉期間虛報係社工一案，有新黨鞭之稱嘅劉慧卿亦喺佢嘅新書中提到呢件事，提醒一向嚴人寬己嘅黨友，千萬唔好「貪小便宜和抄小徑……要白過白雪公主」。
卿姐喺新書度對黃成智冷嘲熱諷，話：「要經常撫心自問，如果事情不是發生在黨友身上，而是在其他政黨人士或政府官員身上，我會怎樣反應？是否橫眉怒目、疾言厲色？要不時提醒自己，用同一把尺量度。」
正如佢成日提大家唔好遲到，但黃成智當係耳邊風，尋日佢以立法會議員身份出席足球賽事，就足足遲到二十分鐘，話揸咗十一年嘅老爺車行到亞皆老街時死火，所以先至遲到喎。
黃成智話今日會由代表律師代為出庭，由昨日開始喺高院門外通宵靜坐嘅監察立法會議員誠信關注組，原本諗住今日直接向黃成智抗議，召集人王文傑話可能改變計劃，去黃成智議員辦事處示威喎！