怪醫尋日喺大氣電波發炮，話私家醫院嘅服務對象多數係本地人，所以一定要起喺交通方便嘅地方先可以吸引到客人，但係政府提出嗰幾幅地都唔多就腳，依家經濟不景氣，新醫院仲要起到無雷公咁遠，投資者可能因預見到難以同位於市區嘅醫院競爭而卻步。

政府一路推說難以喺市區搵咁大地方起私家醫院，但怪醫就兜個圈窒政府冇做功課。佢話依家私家醫院一般佔地零點零六至零點七公頃，而政府預留嘅幾幅地足足有成二點二至四點八公頃咁大，梗係喺市區搵唔到適合嘅地皮啦。怪醫仲話地方愈大，要投資嘅錢就愈多，成本最終又係轉嫁到病人身上，如果政府真係諗過度過，就咁喺市區搵間空置學校都可以改建成私家醫院啦。

投資者商業考慮先行

對於政府早前放風話新醫院嘅收費要一般中產都負擔得起，怪醫就暗示政府搭錯線，因為私家醫院打開門做生意，一定係以商業因素作首要考慮，政府唯一可以做嘅就係提供更多市區用地畀投資者公開競投，私家醫院數目增加，病床長期不足嘅問題得以解決，業界先可以透過良性競爭調低收費。

其實怪醫唔係無的放矢，煲呔曾咁大陣仗去搞私院，但啲私院嘅投資者唔係傻(口架)，睇見佢揀錯地點、篤錯數，邊有人落疊先得㗎，就算有人落疊，到最後發現冇客路支持，實聽執笠，咁咪全部變晒大白象囉！